Ата Мекендик айыл-чарба өндүрүүчүлөрүн колдоо маселеси – бүгүнкү күндөгү эң маанилүү жана орчундуу маселелердин катарында каралып келет. Бул маселенин сапаттуу жана толук кандуу жүзөгө ашырылышы өлкөнүн азык-түлүк коопсуздугун камсыз кылуу максаты менен тыгыз байланышта экени талашсыз. Кыргызстандын азык-түлүк рыногун өлкөнүн өзүнөн өндүрүлгөн товарлары менен толтуруу үчүн мамлекет тарабынан бир катар кечиктирилгиз чаралар көрүлүп келүүдө. Биринчиден, мамлекеттик бюджеттен быйылкы жылда дыйкан-фермерлерди колдоо үчүн буга чейин болуп көрбөгөн өлчөмдө каражат бөлүндү. 2021-жылга чейин жеңилдетилген насыяларга бюджет 2 миллиард сомдон ашпаган суммадагы каражат бөлүп келген, ал эми 2021-жылы ал каражаттардын көлөмү 5 миллиард сомду түзгөн эле.