Быйыл 114 чакырымдан ашык канал оңдолуп, 101 насостук станцияда оңдоо иштери жүргүзүлдү. Бул тууралуу Абдыбай Жайлообаев Sputnik Кыргызстан радиосуна маек куруп жатып билдирди.
Анын айтымында, бөлүнгөн каражаттын 600 миллион сому берилген.
"Өткөн жылда сугат суу тартыштыгынан улам айыл чарбасы үчүн татаал мезгил болду. Быйыл жаан-чачын көп болуп, дыйкандарга жеңил болууда. Анын үстүнө аталган көйгөйдү чечүү үчүн бюджеттен бир миллиард сом бөлүнүп, анын 600 миллион сому берилди. Ага 114 чакырымдан ашык канал оңдолуп, 25 чакырымдай канал бетондолду. 682 чакырым чарбалык каналдар механикалык тазалоодон өткөрүлдү. Баланста 115 насостук станция болсо, анын 101инде оңдоо иштери жүргүзүлдү. Мунун ичинен 45 насостук агрегат жаңыланды. Мындан тышкары, коллектордук-дренаждык тармактардын 45 чакырымы механикалык жол менен тазаланды. Былтыр Чүйдүн бир катар райондорунда сугат суу көйгөйү өзгөчө болду. Ошону чечүү үчүн Батыш Чоң Чүй каналын тазалоого ӨКМдин техникасы тартылды. Панфилов районунда 10 миллион сомдук декадалык суу топтоочу бассейндин долбоору бүткөрүлүүдө. Мындан тышкары, Москва районунда дагы үч, Сокулукта бир декадалык суу топтоочу бассейндин курулуусу пландалууда. Нарын жана Ысык-Көлдө экиден төрт декадалык суу топтоочу бассейн куруу каралган", — деди Жайлообаев.
Ошондой эле ал скважиналарды оңдоп ишке берүү колго алынып жатканын кошумчалады.
