Суу ресурстары, айыл чарба жана кайра иштетүү өнөр жайы министрлигине караштуу Суу ресурстары кызматынын жетекчилиги иш сапарынын алкагында Ош облусуна барып, аймактагы сугат системаларын жакшыртуу, гидротехникалык курулмаларды жаңылоо жана айыл чарба жерлерин сугат суу менен туруктуу камсыз кылууга багытталган иштердин жүрүшүн көрүп чыкты.

Ош облусунда ирригациялык инфраструктураны жаңылоо жана айыл чарба жерлерин туруктуу сугат суу менен камсыз кылуу максатында Куршаб-Сай ирригациялык системасын модернизациялоо боюнча ири долбоор ишке ашырылууда. Долбоор сугат тармактарынын натыйжалуулугун жогорулатууга, суу жоготууларын азайтууга жана аймактагы дыйкан чарбаларынын өндүрүмдүүлүгүн арттырууга багытталган.

Долбоордун алкагында Ош облусунун Кара-Суу районунда жайгашкан Куршаб-Сай дарыя системасына кирген бир катар каналдар реконструкцияланып, модернизацияланууда. Атап айтканда, Отуз-Адыр каналы (43,5 км), К-9 чарба аралык каналы (4,3 км), К-9-1 каналы (1 206 м) жана МКС каналы (2 090 м) жаңыланат. Жалпысынан каналдардын реабилитациялануучу узундугу 42 385 метрди түзөт.

 Бул ирригациялык система 13 114 гектар айыл чарба жерлерин сугат суу менен камсыз кылат. Долбоор аяктагандан кийин сугат каналдарынын өткөрүү кубаттуулугу да жогорулайт. Курулуш иштери 2025-жылдын 24-октябрында башталган жана 2028-жылдын 23-октябрына чейин аяктоо пландалууда.

 Куршаб-Сай ирригациялык системасын модернизациялоо долбоору ишке ашырылгандан кийин аймактагы сугат инфраструктурасы жаңыланып, айыл чарба өндүрүшүн өнүктүрүүгө, суу ресурстарын натыйжалуу пайдаланууга жана климаттын өзгөрүшүнө туруктуулукту жогорулатууга олуттуу салым кошот.